1-fevraldan nimalar o‘zgaradi?

Yetim bolalar va ota-ona qaramog‘idan mahrum bo‘lgan bolalar hisobi onlayn yuritiladi 

2024-yil 14-noyabrda prezidentning “Bolalarni ijtimoiy himoya qilish tizimini yanada takomillashtirish chora-tadbirlari to‘g‘risida”gi Farmoni qabul qilingandi. Farmon bilan 2025-yil 1-fevraldan boshlab yetim bolalar va ota-ona qaramog‘idan mahrum bo‘lgan bolalar hamda ularni muqobil joylashtirish shakllaridan biri bo‘yicha olish istagini bildirgan shaxslarning hisobini yuritish bo‘yicha: 

• yetim bolalar va ota-ona qaramog‘idan mahrum bo‘lgan bolalarni aniqlash, bolalarni hamda ularni muqobil joylashtirish shakllaridan biri bo‘yicha olish istagini bildirgan shaxslarni hisobga olish «Yagona milliy ijtimoiy himoya» axborot tizimida amalga oshiriladi;
• nomzodlardan arizalarni Yagona interaktiv davlat xizmatlari portali (my.gov.uz) orqali qabul qilish imkoniyati yaratiladi;
• nomzodlardan talab qilinadigan ayrim turdagi hujjatlar «Inson» markazlari tomonidan «Elektron hukumat» tizimining idoralararo integratsiyalashuv platformasi orqali mustaqil olinadi; 
• yetim bolalar va ota-ona qaramog‘idan mahrum bo‘lgan bolalarning joylashtirilganligi, bolalar uchun ishlab chiqilgan individual rivojlanish va integratsiya rejalari hamda ularning ijrosi monitoringi natijalari bo‘yicha ma’lumotlar «YAMIH» ATga kiritib boriladi. 

Bolalar bog‘chalarida davomat avtomatlashtiriladi 

Vazirlar Mahkamasining tegishli qaroriga ko‘ra, 2025-yil 1-fevraldan Toshkent shahrida pilot sinovi tariqasida, 2025-yil 1-iyuldan esa barcha davlat MTTda “Bolalar bog‘chasi” axborot tizimi orqali xodimlar va tarbiyalanuvchilarning elektron davomati, ish vaqti, tarbiyalanuvchilarning oziq-ovqat xarajatlarini hisobga olish joriy etiladi. 

Elektromobillarni quvvatlash stansiyalari ko‘payadi 

2025-yil 1-fevraldan davlat muassasalari, mehmonxonalar, biznes-markazlar, savdo va umumiy ovqatlanish ob’yektlari, xalqaro va davlat ahamiyatidagi avtomobil yo‘llari infratuzilmasi ob’yektlari loyihalarida to‘xtash joylarining kamida 5 foizi elektromobillarni quvvatlash stansiyalari bilan jihozlanishi kerak. 

Ijtimoiy karta bo‘yicha «1070» qisqa raqami ishga tushadi 

Ijtimoiy kartani muomalaga chiqarish va foydalanish uchun taqdim etish masalalari bo‘yicha axborot-ma’lumotnoma xizmatlarini ko‘rsatuvchi «1070» qisqa raqamli va tun-u kun faoliyat ko‘rsatadigan xizmat test rejimida yo‘lga qo‘yiladi. 

IT-park rezidentlariga imtiyoz... 

2030-yil 1-yanvarga qadar eksport xizmatlari hajmi kalendar yil davomida 10 million AQSH dollaridan oshgan IT-park rezidentlariga axborot texnologiyalari sohasidagi xizmatlarini (shu jumladan, royalti to‘lanadigan) ko‘rsatgan, O‘zbekiston Respublikasi bilan ikkiyoqlama soliqqa tortishning oldini olish to‘g‘risida bitim tuzilmagan davlatlarning yuridik shaxslarini ushbu kalendar yil yakuniga qadar foyda solig‘idan ozod etiladi.