Yangi elektron tizim: “Iste’molchi murojaati” rasman ishga tushdi

Raqobat qo‘mitasi tomonidan ishlab chiqilgan “Iste’molchi murojaati” elektron tizimi 1 dekabrdan o‘z faoliyatini boshladi.

Yangi platforma orqali fuqarolar va tadbirkorlar o‘z murojaatlarini onlayn tarzda yuborishi, ularning ko‘rib chiqilish jarayonini real vaqt rejimida kuzatib borishi, shuningdek, yakuniy natija bilan tanishishi mumkin.

Tizim quyidagi manzil va ilovalar orqali amalga oshiriladi:

• “Fair tech” yagona axborot tizimi: cabinet.fairtech.uz
• Android uchun mobil ilova: Play Market’da “Fair Tech”
• iOS uchun mobil ilova: App Store’da “Fair Tech”

Ushbu tizimning ishga tushirilishi iste’molchilar murojaatlarini qabul qilish va ko‘rib chiqish jarayonlarini yanada shaffof, tezkor va qulay tarzda tashkil etishga xizmat qiladi.

Endilikda har bir murojaat elektron tarzda ro‘yxatga olinadi va fuqaro uning qanday bosqichda ekanini onlayn tarzda bilib borishi mumkin bo‘ladi.

Mazkur yangilik iste’molchilar huquqlarini himoya qilishda yangi bosqichni boshlab, aholi uchun xizmatlar sifatini oshirishga xizmat qiladi.